Tuairim is milliún duine a tholgann tinnis bhia-iompartha gach bliain sa Ríocht Aontaithe amháin, a dteastaíonn 20,000 díobh cóireáil a fháil in ospidéal agus a bhfaigheann 500 díobh bás.

Is é atá i dtinneas bia-iompartha, a dtugtar nimhiú bia air freisin, ná ionfhabhtú nó greannú gastraistéigeach a tholgann duine tar éis dó bia nó deoch truaillithe a chaitheamh. De ghnáth is é a bhíonn ann ná drochbhail ghéar a thagann ar dhuine gan choinne agus a imíonn tar éis cúpla lá. Is é is cúis leis, den chuid is mó, ná ceimiceáin chontúirteacha, baictéir, víris nó seadáin. Cé go dtagann formhór mór na n-othar chucu féin gan aon ghá le cóir leighis, i gcásanna áirithe is féidir go rachadh an tinneas in olcas nó go mbeadh moill ann sula bhfaighfí réidh leis.

Seo thíos roinnt rudaí nach mór a dhéanamh chun tinnis bhia-iompartha a sheachaint a oiread agus is féidir.

Cliceáil ar na pictiúir thíos chun tuilleadh eolais a fháil.

Déanaimis turgnamh beag anois féachaint cad a tharlaíonn nuair nach stóráiltear earraí bia i gceart. Cad a cheapann tú a tharlaíonn do bhia nuair a choinníonn tú rófhada é?

Féach ar an bhfíseán samhnasach seo ina bhfeicfidh tú an chaoi a dtéann bia ó mhaith in imeacht ama!

Is éasca do thurgnamh "aráin lofa" féin a dhéanamh ar scoil nó i do chistin féin sa bhaile (ach faigh cead ó úinéirí na cistine ar dtús, ar ndóigh!).

Gheobhaidh tú na treoracha chuige sin sa mhír “Turgnaimh Bhaile”!

Cén cur isteach a dhéanann tinneas bia-iompartha ar do chorp?

Seo thíos liosta de na siomptóim choitianta a bhaineann le ‘nimhiú bia’. De ghnáth, tagann siad chun cinn cúpla uair an chloig tar éis duit bia truaillithe a ithe nó laistigh de chúpla lá. Is féidir go mairfeadh na siomptóim ar feadh seachtaine.

• Samhnas (fonn múisce): Masmas ag éirí as cúl do scornaí; do bholg go míshocair. Seans go mbeadh meadhrán i do cheann nó speabhraídí ort. Deacracht rudaí a shlogadh. Seans nach mbeifeá ag cur amach, ach fós fonn múisce ort

• Urlacan (ag cur amach): Nuair a thagann a bhfuil i do bholg aníos do chraos (an t- éasafagas) agus cuireann tú amach é.

• Buinneach: Faecas róbhog nó uisciúil agat trí huaire in aon lá amháin (nó níos minice ná mar is gnách duit)

• Crampaí boilg: Na meatáin i do bholg á dteannadh féin gan choinne agus gan neart agat air

• Teocht ard (fiabhras): Nuair a bhíonn teocht 38°C nó níos airde i do chorp

• Gan a bheith ar fónamh: An-tuirse ort, cuir i gcás, nó pianta agus fuacht ort

Orgánaigh a luaitear go coitianta le nimhiú bia

Cliceáil ar na grianghraif le haghaidh tuilleadh eolais!

Déan an quiz beag seo, féachaint cad tá foghlamtha agat faoi shláinteachas agus faoi bhia a láimhseáil. 🤓