Faoi réir Lainseála 🇬🇧🏴🏴🇮🇪
Suíomh gréasáin oideachais is ea seo chun cur le heolas an phobail faoin saol miocróbach atá ionainn, umainn agus farainn. Tá sé ar fáil i mBéarla, i mBreatnais, i nGàidhlig agus i nGaeilge.
Arna dhearadh agus arna fhorbairt i gcomhar le múinteoirí bunscoileanna agus iar-bhunscoileanna ar fud na Breataine Bige. Acmhainn foghlama saor in aisce is ea seo ar féidir le daltaí meanscoile úsáid a bhaint aisti sa seomra ranga nó sa bhaile. I gcomhar le COGG a rinneadh an leagan Gaeilge.
Is é a thug orainn tabhairt faoin tionscadail seo ná an rath a bhí ar ‘Superbugs: An Siopa Eolaíochta Siúlach’, ócáid a reáchtálamar in St David's Centre, Cardiff le linn laethanta saoire 2019. Tuairim is 6,600 duine a thug cuairt ar ár seastán i gcaitheamh an dá sheachtain a bhíomar ann.
An uaillmhian is bun le Superbugs, agus an t-ábhar go léir a ghabhann leis, tá siad go hiomlán i gcomhréir leis na ceithre chuspóir a luaitear i gCuraclam nua na Breataine Bige agus is ábhartha iad le gach ceann de na sé réimse foghlamtha agus taithí a luaitear sa churaclam céanna.
Is éasca úsáid a bhaint as an suíomh seo agus tá an-chuid ábhair éagsúla le fáil ann. Ina measc sin tá quizeanna, PDFanna is féidir a íoslódáil, míreanna beochana, scéalta arna léiriú le pictiúir, amlínte idirghníomhacha, cluichí agus na prótacail uile a bhaineann le turgnaimh a dhéanamh sa bhaile.
Ní ar bhealach saintreorach a chuirtear na hábhair sin ar fad i láthair. Is é is rún dúinn a chur ar chumas múinteoirí agus daltaí araon úsáid a bhaint as na hábhair díreach de réir a mianta nó a riachtanas féin. Sa bhreis air sin, is féidir an suíomh seo a úsáid chun an t-eolas is déanaí a fháil faoi imeachtaí eolaíochta agus deiseanna atá ar fáil sa Ríocht Aontaithe.
Faoi chaibidil
• Buneolas ar an mbeatha, ar an éabhlóid agus ar na baictéir
• Ionfhabhtú, comhthíosaigh agus na miocróib inár dtimpeall
• Galair, antaibheathaigh agus frithsheasmhacht in aghaidh antaibheathach
• An chaoi a n-oibríonn vacsaíní
7 mbealach chun úsáid a bhaint as Superbugs
Iarr ar dhaltaí ábhair an tsuímh a iniúchadh de réir a dtola féin. Tabhair tréimhse ama shonrach dóibh (15-30 nóiméad) agus iarr orthu tuairisc a thabhairt duit faoina bhfuil faighte amach acu. D'fhéadfaí an tasc sin a thabhairt mar obair bhaile ina mbeadh ar dhaltaí 2-3 phointe shuimiúla - nó "fíricí fánacha" - a chur faoi bhráid an ranga an chéad cheacht eile.
Bain úsáid as ‘An Cúinne Léitheoireachta’ chun stair na bhfionnachtana eolaíochta a bhreathnú agus eolas a chur ar na pearsana faoi deara iad. Deis is ea sin chun naisc thraschuraclaim a chruthú: an eolaíocht agus an stair, cuir i gcás, nó an eolaíocht agus an litearthacht. Iarr ar dhaltaí ceann de na scéalta a léamh (15-30 nóiméad) agus é a phlé i mbeirteanna nó i ngrúpaí.
Cuir ‘Slí na Taiscéalaíochta’ i láthair do dhaltaí agus taispeáin dóibh na míreanna a bhaineann léi (1-3 cheacht). Mar thoradh foghlamtha, d'fhéadfaí a iarraidh ar dhaltaí ábhar ar leith a chur i láthair i bhfoirm póstaeir, faoin teideal, "Cad é an rud é frithsheasamh in aghaidh antaibheathach?" nó "Cén chaoi a n-oibríonn vacsaíní?"
Do dhaltaí óga, is féidir bileoga dathadóireachta faoi bhaictéir a íoslódáil agus a phriontáil amach.
Cuidigh le daltaí turgnamh a dhéanamh de réir an rogha prótacal atá anseo (1-3 cheacht). D'fhéadfaidís a bplátaí agair féin a ullmhú, cuir i gcás, agus maipíneacht a ghlacadh díobh féin nó de nithe timpeall orthu. Ina dhiaidh sin, d'fhéadfaidís na torthaí a thaispeáint don rang agus/nó na torthaí a chur faoi bhráid fhoireann Superbugs.
Tabhair cead do dhaltaí triail a bhaint as an rogha cluichí atá ar an suíomh seo. Cluichí iad ar fad a bhaineann le comhthéacs eolaíochta ar leith, ach san am céanna is féidir iad a imirt gan aon róthuiscint a bheith ag an dalta ar an eolaíocht ar a bhfuil siad bunaithe.
Le linn lá gairmthreorach nó laistigh de cheacht eolaíochta féin, taispeáin an mhír ‘Saol an Eolaí’ do dhaltaí le go bhfeice siad na róil éagsúla a bhíonn ag daoine atá ag obair in earnáil na heolaíochta agus na cúiseanna lena ndeachaigh siad leis an ngairm bheatha sin. Más ócáid speisialta é d'fheadfaí eolas an tsuímh seo a thionlacan le craoladh beo a gcuirfeadh daltaí aithne ar eolaithe lena linn, agus ina ndéanfaí taispeántais bheo, cuairteanna a thabhairt ar shaotharlann, nó ina mbeadh seisiúin cheisteanna agus freagraí.
Téigh i dteagmháil linn
superbugs@cardiff.ac.uk
