Bíonn baictéir á n-iompar timpeall againn an t-am go léir, inár gcorp istigh agus ar ár gcraiceann.

“Féasta fial flaithiúil” is ea do chorp ag na baictéir — féach go bhfuil tú líonta lán suas le cothaithigh (bia), le mianraí, le próitéin agus le carbaihiodráit - na rudaí ar fad a mbíonn na miocróib beo orthu. Go deimhin féin, is mó líon na miocrób atá ag taobhú do choirp ná líon na gceall daonna atá ionat! Is mó a bhaineann baictéir ná daonnacht leat, a dhuine!

Agus buíochas mór le Dia go bhfuil an scéal amhlaidh!

Formhór na mbaictéar atá ionainn, déanann siad a gcion féin chun sinn a choinneáil sláintiúil.

Seo na rudaí a dhéanann siad:

• Cuireann siad feabhas ar ár gcóras imdhíonachta, le gur fearr a throidfidh sé in aghaidh ionfhabhtuithe

• Gineann siad fuinneamh agus cothaithigh is féidir le cealla ár gcoirp a úsáid

• Faigheann siad réidh le ceimiceáin tocsaineacha (nimhiúla) a thagann isteach inár gcorp

• Cabhraíonn siad chun bia a dhíleá

• Cabhraíonn siad lenár gcraiceann agus ár stéig a choinneáil sláintiúil

Féach ar an gcorp daonna seo.

Corp sláintiúil é seo. Cliceáil ar na codanna difriúla de chun a fháil amach cad iad na baictéir a bhíonn ag fás iontu, go fiú nuair nach mbímid tinn!

Is é a thugaimid ar na gnáthbhaictéir seo ná baictéir chomhthíosacha. Úsáidtear an focal "flóra" freisin; orgánaigh de chuid fhlóra ár gcoirp iad.

Ár gcairde agus ár gcomhbhádóirí iad, gan aon agó!