Cad é an rud é frithsheasmhacht in aghaidh antaibheathach?

Nuair a mharaíonn antaibheathaigh baictéar, deirimid go bhfuil an baictéar sin ‘soghabhálach i leith antaibheathach‘.

Go simplí, tá baictéar ‘frithsheasmhach in aghaidh antaibheathach‘ nuair nach maraíonn nó nach ngortaíonn antaibheathach iad.

Impleachtaí na frithsheasmhachta in aghaidh antaibheathach

Is é bun agus barr an scéil ná seo: nuair is baictéar frithsheasmhach in aghaidh antaibheathach atá i gceist, ní oibríonn na hantaibheathaigh.

Ní haon dea-scéal é sin nuair a bhíonn dochtúirí ag iarraidh cóir leighis a chur ar dhaoine atá tinn de dheasca ionfhabhtaithe. Mura n-oibríonn na hantaibheathaigh, ní féidir linn an t-ionfhabhtú a chóireáil. Fágann sin gur faide an tréimhse a mhairfidh an tinneas. Féadfaidh sé gur IN OLCAS a rachaidh sé. Sna cásanna is measa de, féadfaidh sé go bhfaighidh an t-othar bás.

Mar gheall air sin tuigfear chomh tábhachtach is atá sé taighde a dhéanamh le go dtuigfimid na cúiseanna lena n-éiríonn baictéir frithsheasmhach, an chaoi a leathann siad ó dhuine go duine agus an chaoi a leathann siad ar fud an domhain.

Samhlaigh dá mbeadh orainn a bheith ag maireachtáil i saol gan antaibheathaigh, faoi mar a bhí ann fadó!