Fáilte isteach chuig saol rúnda na bhfrídíní atá ina gcónaí ionainn, umainn agus farainn.

Sa mhír ‘An Cine Daonna: Féasta fial flaithiúil’, chuireamar cuid de na baictéir atá ag fás inár gcorp agus ar ár gcraiceann ar do shúile duit. Ach amháin nach féidir leat iad a fheiceáil le do shúile, ar ndóigh, toisc gur nithe micreascópacha iad

Le linn laethanta saoire an tsamhraidh 2019, agus foireann Superbugs ar a camchuairt leis an Siopa Siúlach Eolaíochta, d'iarramar ar dhaoine maipíneacht a ghlacadh ó gach ball dá gcorp féin, ionas go bhféadfaimis cibé baictéar a bhí orthu a bhailiú agus a chur ar fás dúinn féin

Thógamar samplaí ó na páistí go léir: óna srón, óna dteanga, óna scornach, óna bhfiacla agus óna dhá gcluas. Ní hin amháin, ach óna n-aghaidh, óna ngruaig, óna n-imleacán agus óna n-ascaillí. Gan dearmad a dhéanamh ar a nguthán, a bhfáinní, a mbuataisí, an talamh féin agus tráidire easair cait. Sea, an bosca sin ina ndéanann cat a ghnó laethúil, rinneamar maipíneacht a ghlacadh uaidh sin freisin.

Na maipíneachtaí a fuaireamar, chuireamar ar phlátaí agair iad. Plátaí glóthaí is ea iad sin agus iad ag cur thar maoil leis na sólaistí breátha blasta a thaitníonn leis na baictéir. Ansin ligeamar dóibh a bheith ag fás ar a dtoil féin inár saotharlann, agus sa dá lá a lean thógamar grianghraif de na baictéir agus de na múscáin a d'fhás as na samplaí sin!

É sin go léir chun a rá leat go bhfuil ár gcorp agus ár dtimpeallacht líonta lán suas le miocrorgánaigh de gach sórt... agus gach ceann acu níos áille ná a chéile. Nach deas sin?

Cad é sin a deir tú? An iomarca eolais? Fonn múisce ort? Tuigimid do chás! 🤢

Coinnigh súil in airde le himeachtaí beo Superbugs san am atá romhainn agus seans go mbeidh deis agat maipíneacht a ghlacadh ó do chorp féin! ***

Tabhair cuairt ar an mír Turgnaimh Bhaile, mar a bhfuil prótacail i dtaobh do chuid turgnamh Superbugs féin a dhéanamh

Cuir chugainn grianghraif de do chuid turgnamh agus a dtorthaí — de na cinn ar éirigh leo mar aon leis na cinn ar thit an tóin astu!